Adeps
Adeps est divinitas Christi, ut in Psalmis: “Adipe frumenti satiat te,” quod coelestem illam Ierusalem Christus divinitate pascit. Adeps simplex intellectus Scripturae, ut in Psalmis: “Cibavit illos ex adipe frumenti,” quod simplici intellectu refecit eos. Adeps, spirituale desiderium, ut in cantico Deuteronomii: “Cum adipe agnorum et arietum,” id est, cum spirituali desiderio subditorum et praelatorum. Adeps, abundantia, ut in Psalmis: “Prodiit quasi ex adipe iniquitas eorum,” et quod per abundantiam suam peccabant. Adeps, carnalis laetitia, ut in Psalmis: “Adipem suum concluserunt,” id est, carnalem suam laetitiam confirmaverunt. Adeps, bonitas interioris voluntatis, ut in Psalmis: “Sicut adipe et pinguedine repleatur anima mea,” id est, interius bona voce, sicut exterius bona actione.