Gigas
Gigas est Christus, ut in Psalmis: “Exsultavit ut gigas ad currendam viam,” quod Christus hilari quadam fortitudine et forti hilaritate vitae praesenti cursum peragit. Gigas, quilibet sanctus, ut in Psalmis: “Non salvabitur gigas in multitudine virtutis suae,” quod nec sanctus animus in sanctitate sua sine Dei auxilio salvari potest. Gigas, diabolus, ut in Iob: “Irruit in me quasi gigas,” diabolus superbe se erexit contra me. Gigas, criminale peccatum, ut in libro Ecclesiastico: “Nunquid non occidit gigantem?” quod criminale peccatum in se electus quilibet perimere studet. Per gigantes praelati, ut in Iob: “Ecce gigantes gemunt sub aquis,” quod praelati non sine dolore possunt esse solliciti de subiectis. Per gigantes superbi homines, ut in Genesi: “Gigantes regnant super terram,” quod homines reprobi regnant in praesenti vita. Per gigantes principes terrae, ut in Isaia: “Suscitabit tibi gigantes,” id est, eriget in mundo principes sublimes. Per gigantes, desperantes, ut in Isaia: “Gigantes non resurgant,” quod qui desperant, de peccatis per poenitentiam non resurgunt. Per gigantes daemones “Terram gigantium detrahes in ruinam,” id est, infernum, qui est habitatio daemonum, destrues. Gigas, quilibet homo fortissimus, ut in Psalmis: “Gigas non salvabitur in multitudine virtutis suae,” id est, in tolerantia passionum, et velocissimus in transcensu rerum mundanarum, et non tamen salvabitur in multitudine virtutis suae, sine auxilio gratiae.