Eternum
Eternum est quod principio caret et fine, ut in libro Ecclesiastico: “Qui vivit in aeternum, creavit omnia simul,” et invisibilium naturam, et visibilium materiam in angelis fecit. Eternum est, quod habet initium, sed fine caret, ut in Psalmis: “Misericordias Domini in aeternum cantabo,” quod electi misericordias Domini cantare incipient, sed nunquam desinent. Eternum, pro praesenti saeculo, ut in cantico Exodi: “Dominus regnabit in aeternum et ultra,” id est, in hoc saeculo et in futuro.