Matutinum
Matutinum est prosperitas, ut in Psalmis: “Exitus matutini et vespere delectabis;” id est, contemptus prosperitatis et adversitatis fidelibus tuis delectabiles facis. Matutinum, exercitatio, ut in Psalmis: “In matutinis meditabor in te,” id est, in exercitatione mea studebo servire tibi. Matutinum, iustitia, ut in Psalmis: “Et ad matutinum laetitia,” quod illis, qui ad iustitiam Christi tendunt, datur laetitia. Matutinum, dilatio, ut in Psalmis: “Et castigatio mea in matutinis,” id est, sine dilectione castigatus sum. Matutinum, dies iudicii, ut in Psalmis: “In matutino, interficiebam omnes peccatores terrae,” id est, omnes malos in die iudicii, quod lux aeterna oriri incipiet, damnandos intelligebam.