Iuvenes
Iuvenes, intellige fortes, dicente apostolo Ioanne: “Scribo vobis, iuvenes, quod vicistis malignum,” id est, vobis spiritualiter fortibus, quod superastis diabolum. Psalmi: “Iuvenes et virgines, senes cum iunioribus;” iuvenes dicit virtute constantiae: fortes, virgines castitate praeeminentes: senes, consilio maturos: iuvenes, neophytos, hoc est, noviter conversos. Iuvenes, lascivi, ut in psalmis: “Iuvenes eorum comedit,” id est, quod lascivos eorum combussit flamma libidinis. Iuvenes, leves, ut in Iob: “Videbant me iuvenes, et abscondebantur,” id est, qui leves in moribus erant, coram me apparere non audebant.