Bitumen
Bitumen est robur charitatis, ut in Genesi: “Et bitumine linies arcam extrinsecus et intrinsecus,” quod Dominus secundum hominem virtute munit charitatis, tam intus in corde, quam extra in opere. Bitumen, virginitas, ut in Exodo: “Sumpsit fiscellam scirpeam, et linivit eam bitumine ac pice,” quod autem de sapientia elegit virginalem, et eam virginitate ornavit et humilitate. Bitumen, duritia discordiae, ut in Genesi: “Habuerunt lateres et bitumen pro caemento,” quod iniqui robur deserentes bonae actionis, lutum amant libidinis, et abiicientes ligamentum charitatis, duritiam discordiae amplectuntur.