Corpus
Corpus est persona Christi, ut in Evangelio: “Ubicunque fuerit corpus, ibi congregabuntur et aquilae,” quod ubi modo Christus secundum humanitatem est, ibi erunt et animae electorum. Corpus Christi et illud est, quod semel erat in patibulo crucifixum, et id, [quod] quotidie in mysterio est immolatum, et id, quod ei uni Domino subiectum, una fide illuminatum, uno baptismate est mundatum, quod corpus est sancta Ecclesia. Corpus peccatum, ut in Ezechiele: “Duabus alis velabant corpus suum,” id est, timore et poenitentia delevit peccatum suum. Corpus corruptio, ut in Paulo: “Quis liberabit me de corpore meo?” id est, de corruptione mortalitatis huius? Corpus, multitudo reproborum, ut in Iob: “Corpus illius quasi scuta,” quod reprobi, in quibus habitat diabolus, suis se peccatis excusant.