Area
Area est Ecclesia, ut in Evangelio: “Et purgabit aream suam,” id est, mundans Ecclesiam suam. Area, mundus iste, ut in libro Iudicum: “Ponam vellus hoc lanae in area,” quod ad salutem humanam virginem Mariam Deus posuit mundo. Area, latitudo populi gentilis, ut in libris Regum constituit David altare Domino in area Arnan Iebusaei, quod Ecclesiam Patri Christus consecrat in latitudine gentilis populi.