Signaculum
Signaculum est primus angelus, ut in Ezechiele: “Tu signaculum similitudinis Dei,” quod in ipso imago Dei similitudinis fuit impressa. Signaculum, confirmatio electorum, ut in Aggaeo: “Et ponam te quasi signaculum, quod te elegi,” id est, in me confirmabo, quod ad regnum praedestinavi te. Signaculum, virtus castitatis, ut in Cantico: “Pone me ut signaculum super cor tuum,” id est, per charitatem confirma me super mentem tuam. Signaculum, populus gentilis ad fidem vocatur, ut in Iob: “Et clausit stellas quasi sub signaculo,” quod modo sanctos praedicatores destinet in populo gentili, quousque ad convertendas reliquias Israel tempore opportuno procedant. Signaculum, populus quondam electus, ut in Iob: “Restituetur ut lutum signaculum,” quod populus ille quondam per fidem electus nunc propter incredulitatem reprobatur et contemnitur.