Silex
Silex est Christus, ut in libro Numerorum: “Percutiens bis silicem,” quod opprobriis affectus in passione erat Christus. Silex, duritia gentilium, ut in Iob: “Sculpantur in silice,” quod verba fidei Christianae iam suscepta sunt in cordibus gentilium. Silex, actio bona, ut in Iob: “Dabit pro terra silicem,” quod Dominus pro molli conversatione electis suis robustam confert actionem. Per silices sancti angeli, ut in Iob: “Et praeruptis silicibus commoratur,” quod vir sanctus in contemplatione fortitudinis angelorum perseverat, qui in cadentibus confracti sunt.