Cervus
Cervus est anima fidelis, ut in psalmo: “Sicut cervus desiderat ad fontem aquarum,” quod anima fidelis abundantiam concupiscit spiritualium bonorum. Per cervum antiqui Patres, ut in Cantico: “Similis dilectus meus hinnulo cervorum,” quod natus est Christus ex carne antiquorum patrum. Per cervum magni contemplatores, ut in Psalmis: “Montes excelsi cervis:” quod summi contemplationum modi pertinent ad summos contemplatores. Per cervos mundi contemptores, ut in Psalmis: “Posuit pedes meos quasi cervorum,” id est, direxit opera mea ad instar sanctorum virorum. Per cervos sanctitates, ut in Cantico: “Adiuro vos per capreas cervorum,” id est, suadeo vobis amare sanctitates meritorum.