Tuba
Tuba est sonus praedicationis, ut in Ioele: “Canite tuba in Sion,” id est, clamate vocem praedicationis in Ecclesia. Tuba, vox saecularis potestatis, ut in Iob: “Non reputat tubae clangorem,” quod sanctus praedicator nullius saecularis potestatis comminationes pertimescit. Tuba, favor humanus, ut in Evangelio: “Noli tuba canere ante te,” id est, noli intuitu humani favoris bona operari. Per tubas duo praecepta charitatis, ut in libro Numeri: “Fac tibi duas tubas argenteas,” id est, cum nitore praedicationis adimple duo praecepta charitatis. Per tubam praedicationes, ut in libro Iudicum: “Tenuerunt sinistris manibus lampades, et dextris sonantes tubas,” quod pro modico habent sancti doctores quod agunt, respectu praedicationum suarum.