Securis
Securis est Christus, ut in Evangelio: “Securis ad radicem arboris posita est,” quod Christus Iudaeos incredulos exstirpavit. Securis, vir bonus, ut in Isaia: “Nunquid gloriabitur securis contra eum, qui secat in ea?” quod non superabit vir sanctus contra Dominum, qui sanctitatem, quam habet, contulit ei. Securis, correptio, ut in Deuteronomio: “[Si] in succisione lignorum securis fugerit manum,” id est, in prohibitione vitiorum correptio excesserit modum. Securis, donum gratiae, ut in libris Regum: “Ut ferrum securis caderet in aquam,” quod donum aliquando gratiae amittitur per superbiam. Securis, gravis persecutio, ut in Psalmis: “In securi et ascia deiecerunt eum,” id est, in maiore per secutione et minore, conturbaverunt iniqui Ecclesiam.