Vox
Vox est Filius Dei, ut in Psalmis: “Vox Domini super aquas,” quod Filius Dei in carne locutus est ad homines. Vox, contemplatio, ut in Ezechiele: “Cum fieret vox super frumentum,” id est, cum in contemplatione veritatis naturam excederet angelicam. Vox, praedicatio doctorum, ut in Cantico: “Sonet vox tua in auribus meis,” id est, audiatur praedicatio tua ab obedientibus meis. Vox, motus concupiscentiae, ut in Iob: “Rugitus leonis et vox leaenae,” id est, suggestio diaboli et motus concupiscentiae. Vox, compunctio, ut in Ezechiele: “Et vocem commotionis magnae,” id est, clamorem doloris magni. Vox, exhortatio divina, ut in Isaia: “Et aures tuae audientes vocem post tergum monentis,” id est, tu, qui Deo per peccatum dorsum dedisti, ut ad eum per poenitentiam faciem convertas, salubrem intus percipies admonitionem. Vox, suggestio hostis, ut in Iob: “Non exaudierunt vocem exactoris,” id est, non consenserunt suggestioni tentationis. Vox, terror persecutionis, ut in Psalmis: “Elevaverunt flumina vocem suam,” id est, erexerunt superbi persecutores comminationem suam.