Aspis
Aspis est diabolus, ut in Psalmis: “Super aspidem et basiliscum ambulabis, id est, illum deprimes, qui et occulte decipit, et aperte saevit. Aspis, reprobus quilibet, ut in Psalmis: “Aspidis surdae et obturantis aures suas,” quod reprobus sensum cordis ad vocem praedicationis non inclinavit. Aspis, occulta saevitia diaboli, ut in Isaia: “Super foramen aspidis manum suam mittet,” quod per gratiam suam eos nonnunquam Dominus visitat, qui occultam in se diaboli malitiam habuerunt. Per aspidem, spiritus maligni, ut in Iob: “Panis illius vertetur in fel aspidum,” quod delectatio impii in amaritudinem spirituum immundorum mutabitur. Per aspidem, suggestiones diaboli, ut in Iob: “Caput aspidum suget:” quod in via diabolicarum suggestionum impius suscipiet. Per aspidem dolosi, ut in psalmo: “Venenum aspidum sub labiis eorum,” id est, fraus et malitia dolosorum sub verbis latebat Iudaeorum.