Tauri
Tauri sunt Iudaei, ut in Psalmis “Tauri pingues obsederunt me,” id est, Iudaei superbi et feroces afflixerunt me. Tauri, patres Veteris Testamenti, ut in Evangelio: “Tauri mei et altilia mea occisa,” id est, bona iam praebuerunt exempla Patres antiqui, quibus concessum est ut inimicos suos ament. Taurus, cervix superbiae, ut in Iob: “Sumite vobis septem tauros,” id est, mactate in vobis plenarie ducem superbiae. Tauri, haeretici, ut in Psalmis: “Congregatio taurorum in vaccis populorum,” id est, conventicula haereticorum in fecunditatibus hominum.