Faretra
Faretra est occultum iudicium Dei, ut in Iob: “Faretram suam aperuit,” id est, occultum iudicium suum detraxit. Faretra, machinatio pravorum, ut in Psalmis: “Paraverunt sagittas suas in faretra,” id est, tractaverunt consilia sua prava in machinatione. Faretra, consilia sanctorum, ut in Iob: “Super ipsum sonabit pharetra,” id est, ad superandum diabolum consilia sanctorum procedent. Faretra, sacra Scriptura, ut in Genesi: “Tolle arma tua, faretram et arcum,” id est, sanctificationem videlicet, sacram Scripturam et praedicationem.