Virgo
Virgo est illa omnium decus virginum, ut in Isaia: “Ecce virgo concipiet, et pariet filium,” id est, Maria Christum in partu illaesa, quod in conceptu incorrupta. Virgo, sancta Ecclesia, ut in Paulo: “Despondi enim vos uni viro virginem castam exhibere Christo,” quod insistebat idem praedicator egregius offerre Ecclesiam sine macula et ruga Salvatori tuo. Virgo, anima sancta, ut in Levitico: “Virginem ducit uxorem,” quod animam fidelem sibi iunget per amorem. Virgo, mens prava, ut in Isaia: “Sede in pulvere, virgo filia Babylonis,” quod molliter moratur in terrena cogitatione a bono opere sterilis anima vitiorum confusione subiecta. Virgo, plebs Iudaeorum, ut in propheta: “Virgo Israel proiecta est,” id est, plebs Iudaica sterilis et infructuosa ob incredulitatem reprobata est.