Uxor
Uxor est Ecclesia, ut in Apocalypsi: “Sponsam, uxorem agni,” id est, Ecclesiam, sponsam Christi. Uxor, sapientia iustorum, ut in Psalmis: “Uxor tua sicut vitis abundans,” quod sapientia sanctorum internae gratiae humore ditatur. Uxor, exemplum bonum, ut in Levitico: “Virginem ducet uxorem,” id est, castum alterius exemplum in bona sibi conversatione copulabit. Uxor, actio bona, ut in Exodo: “Diligo uxorem et liberos, non egrediar liber,” id est, bonae volo insistere actioni, et fructibus bonorum operum volo adhuc ad libertatem exire contemplationis. Uxor, voluntas bona, ut in Genesi: “Arcam ingredere, tu et uxor tua,” id est, intra in quietem mentis tuae cum bona et devota voluntate. Uxor, voluptas carnis, ut in Evangelio: “Uxorem duxi,” et ideo non possum ad regnum Dei festinare.