Facies
Facies est Deus Pater, ut in Evangelio: “Angeli vero eorum semper vident faciem Patris,” id est, Deum Patrem intuentur iugiter. Facies, Filius, ut in Psalmis: “Usquequo avertis faciem tuam a [me?]” id est, quandiu differs mittere Christum, quem missurus es? Facies, praesentia Dei, ut in Psalmis: “Ne avertas faciem tuam a [me,]” id est, ne deneges in futuro mihi praesentiam tuam. Facies, notitia Dei, ut in Psalmis: “Quaerite faciem eius semper,” id est, desiderate omni tempore pertingere ad cognitionem Dei. Facies, benevolentia Dei, ut in Psalmis: “Ne proiicias me a facie tua,” id est, non sinas me innovatum eiici a facie tua, id est, a benevolentia tua. Facies, scientia Dei, ut in Psalmis: “Avertit faciem suam, ne videat in finem,” id est, non habet scientiam qua possit scire mala nostra. Facies, protectio Dei, ut in Habacuc: “Ante faciem eius ibit mors,” id est, ubi protegit Deus, ibi diabolus praevalere non potest. Facies, animadversio Dei, ut in Iob: “Tunc a facie tua non abscondar,” id est, si talis fuero, animadversionem tuam non timeo. Facies, unusquisque fidelis a Domino cognoscitur. Unde dicitur in Ezechiele quatuor Evangelistis, sub specie quatuor animalium: “Quatuor facies uni erant, et quatuor pennae uni,” quod nimirum eadem fides contemplationis, et par contemplatio divinitatis erat in singulis, quae et in omnibus. Facies, Ecclesia, ut in Apocalypsi: “Facies sicut sol lucet in virtute sua,” quod sancta Ecclesia a Christo illuminatur, et filios illuminat ad imitationem Christi. Facies, cor hominis, ut in Iob: Levabis faciem tuam ad Deum,” id est, eriges ad Deum cor tuum. Facies, intentio, ut in Iob: “Operuit faciem eius crassitudo,” id est, nimia abundantia corrupit intentionem eius. Facies, conscientia, ut in Evangelio: “Tu cum ieiunas, unge caput tuum,” id est, exhilara mentem tuam, “et faciem tuam lava,” id est, conscientiam tuam nuda. Facies, praedicator quilibet, ut in Iob: “Facies mea intumuit a fletu,” id est, praedicatores mei impleti sunt luctu. Facies, bona actio, ut in Cantico: “Ostende mihi faciem tuam, sonet vox tua in auribus meis;” ostendatur Domino facies bene operando, ostendatur et vox salubriter praedicando. Facies, vetus lex, ut in Exodo: “Posuit velamen super faciem suam,.” quod vetus lex velamine tecta est. Facies, praesentia Antichristi, ut in Iob: “Faciem eius praecedit egestas;” quod appropinquante adventu Antichristi, inopia sanctitatis erit in mundo.