Somnus
Somnus est mors carnis, ut in Psalmis: “Cum dederit dilectis suis somnum,” id est, cum electos suos perduxerit ad mortem. Somnus, quies mentis, ut in Iob: “Et somno meo requiescerem,” id est, cordis mei quiete pausarem. Somnus, torpor negligentiae, ut in Parabolis: “Quando de somno consurges?” id est, quando de torpore negligentiae te excuties? Somnus, quilibet hypocrita, ut in Iob: “Velut somnum avolans non invenietur,” quod hypocrita in futuro in conspectu iudicis evanescet.