Bellum
Bellum est persecutio, ut in Psalmis: “Conversi sunt in die belli,” quod instabiles in persecutione deficiunt. Bellum, adversitas saeculi, ut in Iob: “Eruet te in bello,” id est, proteget te in adversitate. Bellum, pugna vitiorum, ut in Iob: “Procul odoratur bellum,” quod vir prudens vitiorum pugnam praevidet. Bellum, tentatio diaboli, ut in Psalmis: “Obumbrasti super caput meum in die belli,” id est, protexisti mentem meam in calore diabolicae tentationis. Bellum, resistens adversarius, ut in Psalmis: “Praecinxisti me virtute ad bellum,” id est, roborasti me patientia contra adversarium. Bellum, suggestio adversarii, ut in Paulo: “Fortes sancti sunt in bello,” quod viri sancti suggestioni Satanae fortiter resistunt. Bellum, ipse malignus, ut in Iob: “Memento belli, nec ultra addas loqui,” id est, qualis sit malignus, semper recordare, et a murmuratione te compesce. Bellum, ultima damnatio, ut in Iob: “Et pluat super, illum bellum suum,” quod Deus super impium aeternam fundit damnationem.