Rugitus
Rugitus est planctus poenitentis, ut in Iob: Et quasi inundantis aquae, sic rugitus meus,” id est, sicut doleo in cogitatione cordis, sic plango in locutione oris. Rugitus, suggestio diaboli, ut in Iob: “Rugitus leonis, et vox leaenae,” id est, suggestio hostis, et motus concupiscentiae. Rugitus, saevitia diaboli, ut in Epistola Petri: “Tanquam leo rugiens,” quod diabolus crudeliter saeviens circuit quaerens quem devoret. Per rugitum sollicitudines praelatorum, ut in Iob: “Incurvantur cervae ad fetum, et pariunt, et rugitus emittunt,” quod praedicatores sancti se humiliant, ut alios praedicando attrahant, et subiectis spirituales sollicitudines impendant.