Tabulae
Tabulae sunt apostoli, ut in Exodo: “Fecitque tabulas tabernaculi stantes,” quod apostolos Ecclesiae fidei et operis rectitudine sublimes Christus fecit. Tabulae, scientia et potestas, ut in Exodo dedit Dominus Moysi: “Duas tabulas,” quod unicuique maxime praelato haec duo valde necessaria sunt, scientia videlicet intelligendi et potestas operandi. Tabulae, cordis latitudo, ut in Cantico: “Compingamus illud tabulis cedrinis,” quod sanctam animam excelsa intrinsecus latitudine Pater et Filius et Spiritus sanctus exornant. Tabulae, latitudo operis, ut in librum Regum: “Et texit pavimentum tabulis abiegnis,” quod virum humilem Deus boni operis latitudine exterius ornat.