Via
Via est Christus, ut in Evangelio: “Ego sum via, veritas et vita,” quod in spe nobis est via in exemplo, veritas in promisso, vita in praemio. Via, bona conversatio, ut in Parabolis: “Via iustorum absque offendiculo,” id est, conversatio bonorum absque criminali peccato. Via, rectitudo Ecclesiarum, ut in Iob: “Nec ambulet per viam vinearum,” id est, non vivat secundum rectitudinem Ecclesiarum. Via, vita nostra, ut in Psalmis: “Dirige in conspectu tuo vias meas,” id est, placitam fac tibi vitam meam. Via, status reproborum, ut in Parabolis: “Via impiorum tenebrosa,” quod status per errorem reproborum est obscurus. Via, raritudo vitae praesentis, ut in Genesi: “Fiat Dan coluber in via,” quod iis qui praesentis vitae dulcedinem diligunt, mollem se diabolus in Antichristo et lubricum exhibebit. Per viam opera Conditoris, ut in Iob: “Ipse est principium viarum Domini,” quod ante opera sua caetera fecit angelum Deus. Per vias praecepta divina, ut in Psalmis: “Vias tuas, Domine, demonstra mihi,” id est, praecepta tua, Domine, inspira mihi. Per vias internae cogitationes nostrae, ut in Psalmis: “Vias meas enuntiavi tibi,” id est, occultas meas cogitationes tibi per confessionem revelavi. Per viam actiones nostrae, ut in Iob: “Nonne ipse considerat vias meas?” id est, cogitationes meas.