Femur
Femur est humanitas Christi, ut in Psalmis: “Accingere gladio tuo supra femur tuum,” id est, viriliter utere verbo praedicationis contra mundum, qui est potentissimus et in assumpta humanitate. Femur, sancti, dicente Ioanne in Apocalypsi de Christo: “Et habet in vestimento et femore suo scriptum: Rex regum et Dominus dominantium,” nam caro Christi, quam ad dexteram Patris collocavit, et sancti, divini verbi semine procreati, ab ipso videlicet testimonium perhibent, quod data sit ei potestas super bonos et malos. Femur, progenies, ut in Genesi: “Animae, quae exierunt de femore Iacob,” id est, homines de progenie Iacob. Femur, carnis delectatio, ut in Exodo: “Ponat vir gladium suum,” id est, per rigorem mortificet cor suum.