Dextra
Dextra est Filius Dei, ut in Psalmis: “Dextra Domini fecit virtutem,” id est, Dei Filius operatur mirabilia. Dextra Dei gratiam, ut in Iob: “Operi manuum tuarum porriges dextram,” id est, illi, quem condidisti, dabis gratiam tuam. Dextra, iusti, ut in Deuteronomio: “In dextera eius ignea lex,” id est, in sanctis eius charitas ardens. Dextra, salus animae, ut in Psalmis: “Diabolus stet a dextris eius,” id est, pecuniam praeposuit saluti animae eius, Dextra, bona actio, ut in Psalmis: “dextra eorum repleta est muneribus,” id est, iustitiam suam vendunt. Dextra, contemplatio, ut in Cantico: “Dextra illius amplexabitur me;” id est, contemplatio illius laetificabit me. Dextra, potentia, ut in Psalmis: “Dextra eorum dextra iniquitatis,” id est, potestas eorum iniqua est. Dextra, prosperitas, ut in lege: “Ne declines ad dextram, nec ad sinistram,” id est, non te eleves in prosperitate. Dextra, quilibet amicus, ut in Psalmis: “Considerabam ad dextram, etc.,” id est, quaesivi inter amicos qui me iuvaret, et non inveni. Dextra, elatio in virtutibus, ut in Iob: “Si me vertam ad dextram, non videbo illum,” id est, si de virtutibus superbio, illum contemplari nequeo. Dextra, vita aeterna, ut in Parabolis: “Longitudo dierum in dextra eius,” quod vita coelestis nunquam per aliquem finem cessabit. Dextra, favor, ut in Psalmis: “A dextris est mihi Deus, id est, favet mihi, “ne commovear .”